انطيني ظهرك شجرة البلوط بغروب الخلگ
اغصانها ترد الهوه
تسافر بعطرك للسمه
و ما يمر اعلى المدن البريتي و تغير مساره
........
ليمته يمخاوي البدو
تزيح الصحاري
الشارع اليم بيتك موشل خضاره

طابعه السكته بقميصك
تمشي و تعاين گفاك و انت واگف
تضحك و عطرك حزين
ليلك يرخص غلاتك و الصبح ما يشتريك
و انت ما عندك تسد دين الخلايگ

جيت انته مستعجل علي
يا شمس بينت بالليل
طين بجرف بموادعك
و انته چنت
بالهودج تشد الحيل
وما فارگتني بغيبتك
هذا انه كل ليله انسحگ
و اسمك بكل حافر خيل

غني و اضحك للرماد
عيش مابين الورد صحوة سكارى
افتح الشباچ بجفوف السنابل
و انته مثل الطيف موت
ابلايه حس
وين ما عاشگ حِزَن
إرهن اعيونك و اخذني
و امشي وي كاس الخمر مشي العذارى

المن يا وطن المن
الماتو .. والمشوا بالليل
و الچانو طعم للخوف
و الچانو شمس نعسانه بالضلمه
المن يا وطن هالماي
مو نشفت اكصص البير
نده الغبشه اعلى دلوه ايمام
ربك يا وطن من السمه استاحشها
حطلها الشهيد الطاحلك نجمه
و لا تجفل يطير الماي
عدنا ارواح عالعطاب و الچويات متعلمه
ما ننطي التعب للغير
خل تنسحك كل شتلة ورد و تموت
المهم عطر الورد بس احنه النشمه
المن يا وطن هالخوف
شگ صدر الليالي و فوت
و مد چفك
اليموت بحرب نلگه اعله چفه اسمه
و تدري انته اليطيح يخاف
مد چفك حرز للشوف
شيكضك يچف نسمه

جيتك بوردة سنيني
و چنت مشمور بروازين الضمه
ليل أحمر جنت حاير مثل طيارة ورق
وحشتي بكاسك .. دمه
و ليلك يموت و يضل زلفي گمر

اول ما بديت اغبش عله املاگاك
شفت الناس تزرع عله الغيم احلام
وگلتلك غيمهم زعلان ياهو الشاف وجه الغيم
و شيحوي اليبدل اهله بخبز و سنين؟؟

ان چان العمر دفتر
ايام التنگضي صفحات ..
و انت الورده و المنديل بالدفتر

حزن اتلذذ بضوگه
طعم روحي و تعب دربي
حزن شايب
حزن صوب الگلب يدبي
حزن لو شاد حيله الگاه شعر شعبي
و لو عطشت عيون الماي
ادگ عيني وتد بالغيم
و اصرخ
يا سواجي الضيم من هذا الحزن شربي
من هذا الحزن شربي ..
عواصف لو تموت بباب هالديره
مهرتي تموت بس ما ينذكر وكت الضحك تعبي
بوكت دين الخلگ من طين
مامش دين
ضل ديني نجم طافي عالوساده
و حزني اچبير ما ينشاف
من عنده عرفت الله
و لو غيري يعيش الصار
چا گال الحزن ربي ..

هناك احبك وين ما تنباع شتلة ياسمين
هناك من تغفى الشمس
يصحى الحنين
انته يل چنك زعل نثيه اعله اهلها
و ندم بعد اول ذنب للتايبين