الشاعر اللي مرسـلٍ لـي قصيـده
مايدري اني ماعـرف ألـف وادور

على جناح الطيـر يرسـل بريـده
وانا على عاده ومذهـب ودستـور

ماقدر اجاري قصـده اللـي يريـده
ولاني على كيفـه بماقـال مجبـور

حره انا ماني مـن اطـرف عبيـده
امشي على كيفي ودربي على نـور

على المسنجـر بالاضافـه زهيـده
ماحط عندي طاقم رجـال طابـور

بالله مـن عرفـه وش اللـي أفيـده
غير الغلط من دون تفكير وشعـور

لاويتشـره والرسـايـل عـديـده
يقول ماترسـل ولاانتـه بمسـرور

انـا عنيـده اشهـد انـي عنـيـده
وابوي رباني على طيـب وطهـور

ماني من اللـي بالتعـارف سعيـده
يضحك عليها النذل بالكذب والزور

انا تـرى بنـت الرجـال الشديـده
مارضى بعيش البغي والظلم والجور

عقلي براسي واخـذ اللـي اريـده
واللي زعل ماهز شعـره بهالكـور

دربي شرف واحيـا حيـاةٍ حميـده
واعيش في جوٍ من الطهر مغمـور

في العقل والزيـن وصفـي فريـده
لاجيت بين البيض كاني من الحـور

حيـاي كاسينـي وربـي يـزيـده
عيبٍ علي لايمكن لطهـري ابـور

أبوي شيخ الجـود والطيـب بأيـده
شيخ حكيم ويبدي الـراي ويشـور

وان كنت شاعر والك مـده مديـده
تكتب ولك بيـن المحبيـن جمهـور

بتشوف اسمي صار وسط الجريـدة
واصير مشهورة مثل مانت مشهور

جات الاجابه مـن مشاعـر أكيـده
فيها تقول العيب منهـي ومحظـور

روح تـرا مانـي بقربـك مزيـده
فارق وتلقى غيرنا وانـت مستـور