(( قلبك مع إنسان ))



يا شينها لا صار قلبك مع إنسان
ماهو معك قلبه مع إنسان ثاني
وأنته تناظر فيه والدمع حيران
تبيه لكن ما تفيد الاماني
ودك تصيح بعالي الصوت يا فلان
وصرخة صدى صوتك تلجّ الاذاني
والناس تفزع لك محبه وشفقان
وكلٍ يجي من كل قاصي وداني
وفي خاطرك حكيٍ يقدر بالاثمان
تبي تعبر له و خان اللساني
وقفت تنظر فيه والدمع هتان
ودك من النظره تبين المعاني
ثم صد عنك وصدته عنك حقران
مجني عليك وصرت مجني وجاني
وترجع كسير وهمّك أشكال وألوان
وذكرى اللقاء تمر مرّ الثواني
وتعيش بالحسره ذليلٍ وندمان
تشيل همٍ ما تشيله مواني
ومن وين ما وجّهت بالصدر نيران
والناس ما يدرون عن ما تعاني