والله مدْرِيٌ مِنْ اللٌيْ يٌمُوتْ فيِ الثٌانِيْ


ياهاجسي غن طـاروق الشعـر غنّـه
إلحق على مابقـى والا العمـر فانـي

وياصدري اصبر مثل صبري على الونّه
ياطول صبرك علىّ .. وشين ماجانـي

يلج فيك الحـزن .. واخفيـه واكنّـه
واذا بغيت اشتكـي ماطـاوع لسانـي

وانا الذي لو ظـروف الوقـت حدنّـه
يمـوت مايشتكـي لفـلان وفـلانـي

من سبة اللي عشقته من صغر سنّـه
اتناه يكبـر .. مثـل ماكـان يتنانـي

كنه خِلِق منـي .. وكنـي بعـد منّـه
والله مدري من اللي يموت في الثانـي

ابيه .. وأقـدّره .. واغليـه واحنّـه
مثل ماهو يرخص الدنيا علـى شانـي

كم واحدٍ ماغـدت بقعـا علـى ظنّـه
لو هو على الكيـف ماقفـى وخلانـي

مابغى من الحـظ والله ماعطـى منّـه
يامـا تمنيتـه .. ويـامـا تمنـانـي

يسوقنـي خافقـي للوصـل واعـنّـه
ولولا غلا صاحبـي ماكـان عنانـي

امن اولٍ يزورنـي محـدٍ درى عنّـه
واليوم عـذره بـلاي عيـال عمانـي

يابو علي صـار لامـن مرنـي كنّـه
يستعجـل بخطوتـه لجـل يتعدانـي

واجيه واقدامـي اللـي كـل ماجنّـه
يردهـا سلـم ابـوي وسلـم جدانـي

العيـن فـي شوفتـه لامـر ممتنّـه
ياجعل يسقـى علـيّ قـدام يجفانـي

الهجر طوّل .. وقدنـي مبطـيٍ منّـه
واخاف اذا زيد .. جا ماعـاد يلقانـي

القلب يصبر علـى فرقـاه .. لكنّـه:
الا طرالي وانـا فـي الليـل سرانـي

ان كنت انا غاليٍ في ناظره .. فإنّـه:
غلاه يجري مـع دمـي .. وشريانـي

لاصار مابه عشم لبليس فـي الجنّـه
احسن ليّ اعيش باقي العمر وحدانـي

ولو سج مني .. عساني ماخلى منّـه
والله مانساه .. كود المـوت ينسانـي