موسوعة شاملة لقصائد وأشعار أمير الشعراء أحمد شوقي..

الِّلى يحب الجمال

يسمح بروحه وماله

قلبه إلى الحسن مال

ما للعوازل وماله

نام يا حبيبي نام

سِهرت عليك العناية

يا ريت تشوف في المنام

دمعي وتنظر ضنايا

الحب طير في الخمائل

شفنا غرائب جنونه

حاكم بأمره وشايل

على جناحه قانونه

تيجى تصيده يصيدك

ومين سِلِم من حباله

وكل خالي مسيره

يعذب الحب باله

يالِّلى مادُقت الغرام

من العيون السلامه

إسلم بروحك حرام

دى عين تقيم القيامة

الاسم عين وتلاقيها

قدح وخمره وساقى

وسحبة الرمش فيها

من بابل السحر باقي

يا ما أنت وحشنيى وروحي فيك
يا مئانس قلبي لمين أشكيك
أشكيك للِّى قادر يهديك
ويبلغ الصابر أمله
أنا حالى في بعدك لم يرضيك
كان عقلك فين لما حبيت
ولغير منصف ودّك ودّيت
تنوى الهجران ولقاك حنيت
يا قلب أنت معمول لك إيه
هو سحرى جرى وإلا انجنّيت
كيد العوازل كايدني
بس إسمع شوف
دا انت مالكني من قلبي
والاّ بالمعروف
حبك كواني تعالى شوف
سَتر العذول دايما مكشوف
وأنا بالصبر أبلغ أملي
يا ما نسمع بكره وبعده نشوف

شبكت قلبي يا عيني
شوفى بقى مين يحلّه
النوم بينك وبيني
إمتى يجينى وأُول له
يا فايتني لسهدى على كيفك
تعالا لي والاَّ أبعت طيفك
توحشني وأنت ويايا
وأشتاق لك وعينيك في عينيا
وأذَّلِّل والحق معايا
واجى أعاتبك ما تهونش عليا

وطن جمالك فؤادي يهون عليك ينضام

شهد معالم ودادي وتضيع الأعلام

يا دى العجايب شوف فرحة اللوّام

اللى ما يعرف العادي تعرفه الأيام

الناس لليل تشكى

وتجى له تحكى

والليل لمين يشكى

ويروح لمين يحكى

بدرك ياليل طلَّعته

وبدرى خبيته

غاير يا ليل قل لي

تكونش حبيته

يا ليلة الوصل استنى

أفرح بِحِبي واتمتع

الصبح ليه ياخذه مني

والفجر مين قال له يطلع

أهُون عليك تزيد ناري

ولساني يشكى لك لم ترحم شاكي

وليه بلحاظك ليه تضحينى

وانا أبات ليالي باكي

أرى النجوم أناجيها من وجدى

وان لاح البدر يواسيني

يشوف حالي ينظر إلى حسنك

تشوف خيال حبيبي عيني

رضيت أنا بما ترضاه ياروحي

بس أتعطَّف وانظر عانى

أخاف تبعتلي طيف خيالك

يروح ولا يجنيش تاني

كان عهدي عهدك في الهوى

يا نعيش سَوَى يا نموت سوى

أحلام وطارت في الهوى

تركت مريض من غير دوا

ليه طول الجفا ليه ضاع الوفا

ليه زاد الأسى ليه روحي تهون

أحب أشوفك كل يوم
يرتاح فؤادي
والقلب داب من البعاد
يا طول عذابي
يا سيدي شوف ذُلِّي
إِليك الامتثال
حرام عليك ارحم ودادي
رأيت خياله في المنام
ما أحلاه يا وعدي
والفكر تاه في دى الجمال
زوّدت وجدي
يا روحي راح عقلي عليك
وأقول كمان
وحياة عينيك تحفظ لي عهدي

دار البشاير مجلسنا

وليل زفافك مؤنسنا

إن شا الله تفرح يا عريسنا

وان شا الله دايما نفرح بك

على السعادة وعلى طيرها

وادخل على الدنيا بخيرها

فرحه تشوف لابنك غيرها

وتعيش لأهلك واصحابك

الشمس طالعة في التلِّى

ورده وعليها توب فُلِّى

ملحه في عين اللي ما يصلِّى

ولا يقولش تتهنَّى

دنيا جميلة قم خدها

سِتَّك وبالمعروف سيدها

قوم يا عريس بوس إيدها

وصلى واطلب واتمنى

حرّة تصونك وتصونها

وتقوم بدارك وشؤونها

تشوف عيونك وعيونها

دُخلة ولادك والحِنه

كل اللي حب اتنصف

وانا اللي وحدى شكيت

حتى اللى رحت اشتكى له

قال لي ليه حبيت

لا شكوى نفعت ولا يا قلـ

ـب الحبيب رقيت

احترت والله واحتار دليلي ياناس

يارب أمرك بِالِّلى كتبه أنا رضيت