أسف لاني ماني بقادر أنساك

آسف ... لاني ماني بقادر أنساك ،
إسمح لي آتذكرك وأسهر وأعاني !

حآولت ، قدر المستطاع أتناساك ،
وبالي وقف معك وذكرك ونساني !

ليت المفارق ، سبته من خطاياك ،
عشان لامن جيت أبنسى : مداني !

أودعك .. وتسافر بعيـد .. وألقـاك ،
وأستقبلك / لكن في ، شكل ثاني !

طيفك تبسّامك سوالفك ذكراك ،
تمرّني مثل : الكلام بــ لساني !

وآمر ، شايل لهفتي ، وأتعداك ،
غصبٍ على عين : الأمل والأمـاني !

وأنا / لو إنه في يديّ ، أتحرّاك ،
وأسرقك من وقتٍ عصاك وعصاني !

وأشـر هنا وأقول هذي : زواياك ،
فـ الصدر .. وأقفّل عليك : المحاني !

كنت أبتسم ، لاجيتني في هداياك ،
والحين .. هي اللي تزلزل : كياني !

رغم إن مكاني شايله في حناياك ،
من غيبتك ، وانا ( مكاني مكاني ) !

من طيب قلبك تعتذر لي بفرقاك ،
والمشكلة / كان الخطأ من زماني !

اللي ذبحني فيك .. طيبة : مزاياك ،
واللي ذبحني فيّ لازلت : أنـاني !

لا إحتلت في وصلك ولاقادر أنساك ،
أمّا : تجي ..... ولّا تردّى / عشاني !



راقت لي ..

يسلمووووو على الطرح الجميل خيتي

دمتي بود اناافداااك .........

كلمات جميله وروعه
معبره عن الشوق والحنين
ووصف الاحنين
اعتراف جميل وكلمات اجمل بكثير
سرحنا بهاء بعالم الخيال والشوق والوصال
يعطيك الف عافي

وأنا / لو إنه في يديّ ، أتحرّاك ،
وأسرقك من وقتٍ عصاك وعصاني !


انتقاء رائع

يعطيك العافيه على هذا الاختيار الرائع

تقبلي مروري هنا

وننتظر جديدك

.


جَميلةةْ و آلخَآلقْ
سَلمتِ