سامحيني ياحبيبتي !!!!! مجدي الحفناوي

سامحيني ياحبيبتي !!!!! مجدي الحفناوي
سامحينى ياحبيبتي
مش لاقى النجم اللى يغنى
ويقول النغمة من فنى
وبيفهم مضمون مغزاكى
ويرفرف على معنى هواكى
والناى والعود المتحنِّى
ويقدِّر عزفى وتلحينى

سامحينى ياحبيبتي
دا حروفك تاهت على سطرى
والشوق بينادى على خاطرى
ولا نفسى أشوفك محتارة
متغمى عيونك بستارة
أنا نفسى تكونى مطاوعانى
وتلفى تدورى ف طواحينى

سامحينى يا حبيبتي
بتقولى حروفى مخنوقة
بتدوّر تبحث ع المعنى
والضحكة طالعة مزنوقة
ونشاز ف الصوت وف المغنى
والحب الغايب
صار دايب
متخبى جوا كاسات صمتك
والبدر ف ليلك بقى هايم
متونس بيكى وأنا نايم
وبقولك اوعى تصحِّينى؟!

سامحينى يا حبيبتي
أنا عارف إنك عايزانى
من أجمل بحر ف أوزانى
من أسود حرف ف أحزانى
أرسملك أجمل ضحكاية
وأخلـّى صوابعى تغزلك
وتعاتبى لو قيد بيذلك
وتقولى والدمعه ف عينك
ع السر
اللى أنا بينى وبينك
احذفنى من مجمع لغتك
ابعدنى عن خط هواك
عن دفتر عشقك نحِّينى

سامحينى يا حبيبتي
كان نفسى ادلّع أنا فيكى
وقاموسك يضرب مزازيكى
من رسمك أزخرف أشعارى
وقيمتك تصبح دا شعارى
والكل هيفرح يتهنّى
ولإمتى هافضل أتمنى؟!
وطيرى يغرّد أنا بيكى
وشاريكى وعارف أنا كاسب
مش لاقى الفرصه اللى تناسب
ولا وقتى حتى ولا حينى

سامحينى يا حبيبتي
أنا باكتب فيكى وبتأثـّر
لو لفظ معايا بيتعثـّر
وباحط رتوشى لتزويقك
علشان أحلامك تتفسّر
لو تهت أنا مرة فى طريقك
ولقيتى إيقاعى بيتكسّر
أرجوكى تعالى وصالحينى

سامحينى يا حبيبتي
تفعيلة وزنك بتميل
والقافية طافية على النيل
"كبُرَت كلمةً"
"ما يلفظ من قول"
فى البدء كانت الكلمة
والجيل بيسخر من جيل
لا حد بيقرا ف قرآن
ولا حد بيفتح إنجيل
متغير لونه ف مطابعك
والعاشق
بيتوه ف مسالك
متحير أمره من طبعك
بتقولى بسرعة
من فضلك اشطب
امسحنى
ومقص بيضرب ف النَص
ويا ريتك تقدر تمحينى

سامحينى يا حبيبتي
مش لاقى النجم اللى يغنى
ويقول النغمة من فنى
وبيفهم مضمون مغزاكى
ويرفرف على معنى هواكى
والناى والعود المتحنِّى
ويقدِّر عزفى وتلحينى
سامحينى يا حبيبتي
سامحيني
بقلمي
مجدي الحفناوي